கோடைகால வெப்பத்தைத் தணிக்க 5 ஆரோக்கியமான பானங்கள்: செய்முறை விளக்கம்!

தமிழகத்தில்  கோடைக்காலம் தொடங்கிவிட்டாலே அக்னி நட்சத்திர வெயிலும் கூடவே வந்துவிடுகிறது. குறிப்பாக சென்னை, மதுரை, வேலூர் போன்ற நகரங்களில் வெயிலின் தாக்கம் விண்ணைத் தொடும். இந்தச் சூழலில் நமது உடல் சீக்கிரம் நீர்ச்சத்தை இழந்து (Dehydration), சோர்வடைந்துவிடுவதால் பல்வேறு பிரச்சினைகளை சந்திக்கிறோம். கடைகளில் பாட்டில்களில் விற்கப்படும் ரசாயனம் கலந்த குளிர்பானங்களை தவிர்த்து, வீட்டிலேயே இயற்கையான முறையில் உடலை குளிர்விக்கும் 5 சிறந்த பானங்களை எப்படித் தயாரிப்பது என்று இங்கே விரிவாகக் காண்போம்.

1. நுங்கு சர்பத் (Ice Apple Sherbet)

கோடைகாலத்தின் பொக்கிஷம் என்று ‘நுங்கு’ அழைக்கப்படுகிறது. இப்போது நுங்கு சீசன் வந்துவிட்டதால் நாம் இதை தினமும் எடுத்துக் கொள்ளலாம்.                       இது இயற்கையிலேயே உடலுக்குக் குளிர்ச்சியையும், செரிமான சக்தியையும் வழங்கக்கூடிய ஒரு நல்ல இயற்கை உணவு

தேவையான பொருட்கள்:

• நன்கு முற்றிய அல்லது இளசான நுங்கு – 4 முதல் 5

• காய்ச்சிய பால் அல்லது இளநீர் – 1 கப்

• நாட்டுச் சர்க்கரை அல்லது தேன் – 2 டீஸ்பூன்

• ஏலக்காய் தூள் – ஒரு சிட்டிகை

• ஐஸ் கட்டிகள் – தேவையான அளவு

செய்முறை:

1. முதலில் நுங்கின் மேல்தோலை மிக நீக்கிவிட்டு, அதைச் சிறிய துண்டுகளாக நறுக்கிக் கொள்ளவும்.

2. ஒரு மிக்ஸி ஜாரில் நறுக்கிய நுங்கு, பால் (அல்லது இளநீர்), இனிப்பிற்குத் தேவையான நாட்டுச் சர்க்கரை ஆகியவற்றைச் சேர்க்கவும்.

3. அனைத்தையும் நுரை வரும் வரை நன்றாக அரைக்கவும்.

4. ஒரு கண்ணாடி குவளையில் ஊற்றி, மேலே ஏலக்காய் தூள் தூவி, ஐஸ் கட்டிகள் சேர்த்துப் பரிமாறினால் சுவையான நுங்கு சர்பத் தயார்!

2. தர்பூசணி ஜூஸ் (Fresh Watermelon Juice)

தர்பூசணியில் 90% நீர்ச்சத்து உள்ளது. இது வெயிலால் ஏற்படும் தாகத்தை உடனடியாகத் தீர்க்கும் வல்லமை கொண்டது.

தேவையான பொருட்கள்:

• விதையற்ற தர்பூசணி துண்டுகள் – 2 கப்

• எலுமிச்சை சாறு – 1 டீஸ்பூன்

• புதினா இலைகள் – 5

• மிளகுத் தூள் – ஒரு சிட்டிகை (விருப்பப்பட்டால்)

செய்முறை:

1. தர்பூசணியைத் தோல் நீக்கி, சிறிய துண்டுகளாக வெட்டி அதன் விதைகளை நீக்கவும்.

2. மிக்ஸியில் தர்பூசணி பழத் துண்டுகள், புதினா இலைகள் மற்றும் எலுமிச்சை சாறு சேர்த்து நன்றாக அரைக்கவும்.

3. தர்பூசணியில் இயற்கை இனிப்பு இருப்பதால் சர்க்கரை தேவையில்லை.

4. இதனை வடிகட்டாமல் குடிப்பது நார்ச்சத்தை அப்படியே பெற உதவும். பரிமாறும் போது சிறிது மிளகுத் தூள் தூவினால் அதன் சுவை அலாதியாக இருக்கும்.

3. பாரம்பரிய மசாலா மோர் (Masala Buttermilk)

வெயில் காலத்திற்கு மோரை விடச் சிறந்த மருந்து வேறு எதுவுமில்லை. இது வயிற்றுப் புண்களை ஆற்றி, குடலுக்கு நன்மை செய்யும் பாக்டீரியாக்களை உருவாக்குகிறது.

தேவையான பொருட்கள்:

• புளிக்காத கெட்டித் தயிர் – 1 கப்

• குளிர்ந்த நீர் – 2 கப்

• இஞ்சி – ஒரு சிறிய துண்டு (தட்டியது)

• பச்சை மிளகாய் – 1 (விருப்பப்பட்டால்)

• கறிவேப்பிலை மற்றும் கொத்தமல்லி – சிறிதளவு

• உப்பு – தேவையான அளவு

செய்முறை:

1. தயிரை ஒரு பாத்திரத்தில் ஊற்றி மத்து அல்லது விஸ்க் கொண்டு நன்றாகக் கடையவும்.

2. அதில் நீர் சேர்த்து மோராக மாற்றவும்.

3. பின்பு தட்டிய இஞ்சி, நறுக்கிய பச்சை மிளகாய், கறிவேப்பிலை, கொத்தமல்லி மற்றும் உப்பு சேர்த்து நன்றாகக் கலக்கவும்.

4. சாப்பிட்ட பிறகு ஒரு டம்ளர் மசாலா மோர் குடிப்பது செரிமானத்திற்கு மிகவும் நல்லது.

4. எலுமிச்சை சர்பத் (Refreshing Lemonade)

வைட்டமின் சி நிறைந்த எலுமிச்சை, உடலில் நோய் எதிர்ப்புச் சக்தியை அதிகரிப்பதோடு உடனடி புத்துணர்ச்சியையும் தரும்.

தேவையான பொருட்கள்:

• பெரிய எலுமிச்சை பழம் – 1

• தண்ணீர் – 2 கப்

• சப்ஜா விதைகள் (ஊற வைத்தது) – 1 டீஸ்பூன்

• உப்பு – ஒரு சிட்டிகை

• சர்க்கரை அல்லது நன்னாரி சர்பத் – 2 டீஸ்பூன்

செய்முறை:

1. எலுமிச்சையைப் பாதியாக வெட்டி சாறு பிழியவும்.

2. ஒரு ஜாடியில் தண்ணீர், சர்க்கரை மற்றும் ஒரு சிட்டிகை உப்பு சேர்த்து சர்க்கரை கரையும் வரை கலக்கவும்.

3. அதில் எலுமிச்சை சாறு மற்றும் முன்பே ஊற வைத்த சப்ஜா விதைகளைச் சேர்க்கவும்.

4. சப்ஜா விதைகள் உடல் சூட்டைத் தணிப்பதில் மிகச்சிறந்தவை. இதனை ஐஸ் சேர்த்துப் பரிமாறலாம்.

5. மாம்பழ ஸ்மூத்தி (Mango Smoothie)

பழங்களின் ராஜாவான மாம்பழம் கோடையில் மட்டுமே கிடைக்கும் ஒரு வரப்பிரசாதம். இது குழந்தைகளுக்கு மிகவும் பிடித்தமான பானமாகும்.

தேவையான பொருட்கள்:

• நன்கு பழுத்த மாம்பழம் – 1

• குளிர்ந்த பால் அல்லது தேங்காய்ப்பால் – 1 கப்

• தேன் – 1 டீஸ்பூன்

• பாதாம், முந்திரி துண்டுகள் – அலங்கரிக்க

செய்முறை:

1. மாம்பழத்தின் தோல் மற்றும் கொட்டையை நீக்கிவிட்டு அதன் சதைப்பகுதியை மட்டும் எடுக்கவும்.

2. மிக்ஸியில் மாம்பழம், பால் மற்றும் இனிப்பிற்குத் தேன் சேர்த்து ‘Smooth’ ஆக அரைக்கவும்.

3. ஒரு கண்ணாடி குவளையில் ஊற்றி, மேலே பொடியாக நறுக்கிய பாதாம் அல்லது முந்திரி தூவிப் பரிமாறவும். இது ஒரு முழுமையான காலை உணவாகவும் அமையும்.

ரம்ஜான் நோன்பு: சஹூர் மற்றும் இப்தார் உணவுகளின் முக்கியத்துவம்

முடிவுரை:

இந்த 5 வகை கோடைகால பானங்களும் செய்வதற்கு மிகவும் எளிமையானவை. இவற்றைத் தொடர்ந்து பருகுவதன் மூலம் வெயிலால் ஏற்படும் சோர்வைத் தவிர்த்து, உற்சாகமாக இருக்கலாம். முடிந்தவரை ஐஸ் கட்டிகளுக்குப் பதில் மண்பானை நீரைப் பயன்படுத்துவது உடலுக்கு கூடுதல் ஆரோக்கியத்தைத் தரும்.